PYC CHANCHIN TAWI

PCI (Presbyterian Church of India) hnuaia Synod 8-te thalai pawl leh Synod la ni lo Unit 4, a vaiin 12 thlung khawmtu chu Presbyterian Youth Fellowship hi a ni a, chung PYF Unit 12-te chu :-

1. KTP (Mizoram)

2. PYF (CHT)

3. PYF (Manipur)

4. KVP (Biateram)

5. PYF (Ribhoi)

6. JS (Synod Sepngi)

7. JS (Synod Mihngi)

8. PYF (Zou)

9. KJS (Barak Area)

10. MPCN (Manipur)

11. KAGAA (Karbi Anglong)

12. PYF (Tripura).

PYF hian kum khat danah Inkhawmpui (Bienniel Conference) an nei thin a, Conference neih loh kumah Workshop, Youth Camp leh thildang an nei thin bawk. Conference hnuhnung ber (vawi 18-na) chu 2009 khan Haflong-ah CHT Synod in thlengin Moulhoih Presbyterian Biak Inah Hmar hnam ten an thleng a, vawi 19-na hi Mizoram thlen hun a nih avangin Chanmari Kohhran hian Mizoram Synod aiawhin he inkhawmpui hi a thleng dawn a ni.

Mizoram hian tun hma pawhin a lo thleng zeuh zeuh tawh a. Dawrpui, Ramhlun North, Durtlang, Zarkawt leh Serchhip Kawnpui ten an lo thleng tawh a ni. Chanmari Kohhran atangin tuna kan Pastor Rev. K.Lalhmingliana hi Comtt. Member a lo ni tawh a, Upa JH Ramnghinglova chu Secretary lo ni tawhin, Upa C.Vanlalvuana chu tunah hian Asst. Leader a ni mek bawk a ni.

Khawmpui thleng tur hian Chanmari Kohhran chuan Committee 10 zet a siam a, heng committee khaikhawm turin Kohhran Committee chu Organising Committee a ni nghal a ni.

Khawmpui thupui atan "Endure, and reign with Him" (II Tim. 2:12) a ni ang a, ni 1 May, 2011 (Sun.) zan inkhawm banah Kohhran Hall-ah Musical Night hman a ni ang.