SPECIAL CAMPING PUALIN TAWNGTAI TLAIVAR HUN HMAN A NI DAWN

Kristian Thalai Pawl, Chanmari Branch in kum 2010-a Project a neih zing a mi 'Special Camping' neih nise a tih chu Kohhran Committee ruahman angin ni 9 - 29 August, 2010 chhungin Chanmari Kohhran Biak Inah neih a ni dawn. He Camping hi chhawng hnih (9-14 Aug. & 16-21 Aug.) neih tura ruahman a ni a, 23-29 Aug. chhun lamah Follow-up leh zan lamah Crusade anga hun hman a ni ang. He Special Camping-ah hian Pu Lalsanglura Ralte (Speaker, Sons of God Ministry) leh a rawngbawlpuite chu rawngbawltu tura tihfel an ni tawh a ni.
He Special Camping neih tur pual hian Chanmari Branch Kristian Thalai Pawl chuan ni 6 August, 2010 (Zirtawp) zan hian Tawngtai Tlaivar hun a hmang dawn. Tawngtai Tlaivar hi zan dar 7:00 atanga zing dar 5:30 thleng neih tur a ni a, Branch hnuaia Group 6 zinga Group 3-te darkar khat chhung an tawngtai laiin Group 3 dangte chuan Kohhran Hall-ah Zaikhawm/Sharing etc. neiin hun an lo hmang ve thung dawn a, hetiang hian darkar 1 chhung zel inchhawka hun hman tura ruahmanna siam a ni a, zan dar 12:00 atanga 12:30 thleng tea-break neih a ni ang. Special Camping puala tawngtai tlaivar hun atan hian tawngtai thupui tur 16 siam a ni.