KTP DAY

Vawiin, February 22 (Pathianni) hi KTP din champha vawi 55-na a ni a. KTP, Central Committee chuan kumin hi Pathianni a nih avangin ruahmanna hranpa a siam lova. Kum hmasa lama hman dan tur Circular a lo siam tawh angin Social Work, Blood Donation leh midangte tana tangkai thei tura hmang turin CKTP Leader Rev. C. Lalsanglianan Thuchah a siam a, Local Cable hrang hrangah tihchhuah a ni.

Kristian Thalai Pawl din tanna chiah hi hriat chian a har hle a. Kum 1953 November 27-ah Teachers’ Training School, Aijal-ah khawpui chhung mi pawimawh deuh deuhte leh thingtlang Middle School zirtirtute inhmuhkhawm atanga din chhoh a ni a, Provisional Committee din phawt a ni a, Synod Standing Committee-in a pawmpui hnuah mumal deuh zawka kalpui chhoh a ni ta a, February 22 hi KTP Day atan hman zui a ni ta bawk.

KTP dinnaa hnarkaitute chu:-

Chairman - Rev. O.W. Owen (Pu Awna)

Vice Chairman - Pu Lalthankima

Organising Secretary - Nl Zokhumi (Mission Veng)

Asst. Secretary - Tv Luka

Treasurer - Mrs. Owen (Pi Awni)
Committee Members - Pu Vanlalkunga (Dawrpui) leh Pu Thanhnuna (Venghlui) te an ni.

Kum 2004 khan KTP kum 50 tlinna (Golden Jubilee) chu Vaivakawn YMA Field-ah General Conference neih pahin ropui taka lawm a ni nghe nghe. KTP General Conference kum tina neih thin chu 2004 atang khan kum khat dana neih a ni ta a. KTP General Conference neih loh kumah hian Rorel Inkhawm neih thin a ni a, Bial tin atangin Palai an inruat thin a ni. Nikum 2008 khan KTP General Conference, Bilkhawthlirah nghah a ni a, kumin 2009 hian Rorel Inkhawm, Chawlhhmun Kohhranah March 7 & 8 hian nghah a ni. Kristian Thalai Pawl hian Pastor Bial 151-ah Branch 758 neiin member 112,925 an nei mek a ni.

Chanmari Branch KTP chuan Fellowship hunah KTP Day Programme hi a hmang dawn a, KTP chanchin chhiarchhuah a ni bawk ang.