PAVALAI REVIVAL MEET

Ni 29 - 30 May 2010 hian Chanmari Presbyterian Kohhran chuan Mizoram pum huap Pavalai Revival Meet a thleng dawn. He Meet hman tur hi a vawi 5-na tur a ni a, thupui atan "Pathian thiltihtheihna" I Kor. 4:20 niin Speaker atan Rev. C.Chanchinmawia a ni ang. Chanmari Branch Kristian Thalai Pawl chuan he meet-ah hian Reception & Accomodation a buaipui dawn a, palai/mikhual buaipui turin ni 29 May, 2010 (Inrinni) zing dar 7:0o atangin KTP Member-te Kohhran Hall-ah chhuak khawm tura ngen leh hriattir kan ni e.

RAMTHAR PROJECT

Chanmari Branch Kristian Thalai Pawl-in Ramthar Project (2010) atana Budget-a a dah chu a hnuai a mi ang hian hman tura ruahman a ni -
1. Karbi Anglong Mission Field-a Jengkha (Dongkamukam Bial) Biak In sak zawm nan Rs. 30,000/-

2. Barak Area-a Jiribam Bial Uchhathol Nurse Quarter sak nan Rs. 35,000/-

2010 MUSIC BUDGET

Kum 2010 chhunga Music Committee Budget atana ruahman Rs. 48,000/- chu pawm a ni. Music Committee hi hun engemaw chen atangin Kohhran Committee chuan KTP-te kutah a lo dah tawh thin a, chu mawhphurhna chu KTP ten la chang zelin Kohhran Zaipawl mai bakah Kohhran Inkhawma zai hruai tura ruatte pualin training-te buatsaih thin a ni.

Kumin hian Kohhran Inkhawma hla hruaitu (Keyboard tumtu) indaih lohna tih ziaawm nan kum danga la tih ngai loh Music zir tur mi pahnih emaw thlan chhuah a chung mite sponsor tur chuan ruahmanna siam a ni a, tin, kum dang ang bawkin Zaipawl Member-te intuaithar (retreat) pawh neih leh ngei tum a ni bawk.

A hnuaia mi hi 2010 Music Committee Budget ruahman chu a ni -

1. Refreshment - Rs. 15,000/-

2. Transportation - Rs. 6,000/-

3. Hla copy, Music track - Rs. 5,500/-

4. Hla hruaitu Training - Rs. 1,500/-

5. Music zirna - Rs. 10,000/-

6. Zaipawl Retreat - Rs. 10,000

SOUND TRAINING NEIH A NI

Chanmari Branch Kristian Thalai Pawl buatsaihin ni 29 & 30, April, 2010 zan ah te Sound Training neih a ni. He Sound Training hi Kohhran leh Thalai inkhawma Sound Incharge-te leh Property Sub-Committee Member-te tana buatsaih a ni. Ni 29 (Thur.) zanah mi 27 leh veng pawn lam mi chhhimtu 8 an tel a, a zan hnihna ah mi 26 leh chhimtu 1 an tel.

Training hi Practical leh Theory a neih a ni a, Pu Vanlelpeka (Branch Fin. Secy.) leh Tv. Amby Lalliantluanga (Comtt. member, Property Sub-Comtt.) ten hun an hmang. Training a tel ten an hlawkpui thu an sawi.

SOUND TRAINING NEIH A NI DAWN

Chanmari Branch Kristian Thalai Pawl chuan kumina Kohhran leh Thalai inkhawma Sound Incharge-te pualin 'Sound Training' a buatsaih dawn. Training pe tur hian Branch chhunga hetiang lam a mithiam kan neih Pu Vanlalpeka (Branch Finance Secretary) leh Tv. Amby Lalliantluanga (Commtt. Member, Property Sub-Committee) te ruat an ni. Kum dangah pawh hetiang hun hi hman a ni tawh thin a, a tel ten hlawk pui thin avang leh a tangkaina hria in Branch Committee chuan neih leh turin a rel a ni. Training hi ni 29 (Thur.) leh 30 (Fri.), April 2010 zanah Kohhran Hall-ah a kim chang thei ang berin Theory leh Practical a neih a ni ang.

Pu Vanlalpeka hi kum 2008-a Central KTP in Branch tin te tana VCD a buatsaih 'Sound Training Video Clip' siamtu a ni a, tunah hian Sound system hawh chhuah, install leh leih theihin 'Extreme Sound' tiin sumdawnna a kalpui mek a, Tv. Amby Lalliantluanga hi 'Active Sound'-a an khaipa leh rinrawl ber a ni bawk.

KAN TUAR PUI E

Kan Branch Committee Member leh Hagaia Group Leader ni bawk Tv.Lallawmsanga nu Pi Ngurbiaki(Kum 60)chuan hun reitak Cancer natna a tawrh hnuin Ni 22.5.2010 zing dar 4:10 khan chatuan ram panin a kal ta, hemi ni vek hian vuiliam a ni. Khawhar chhungte kan tuarpui takzet e. Tv.Lawmsanga U te Nl.Lalnuntluangi leh Pu Lalthlamuana te pawh hi Branch Committee Member lo ni tawh anni.
Tunah inthen rih mah ila, van nuam ah kan intawk leh ang.

SMS hman tangkai a ni dawn

Chanmari Branch Kristian Thalai Pawl chuan May thla atang hian SMS hman tangkai tumin hma a la mek. Nikum atang khan 'SMS Gupshup' chu tangkai taka hman a ni tawh a, hmalakna thar hi Gupshup anga join ngai kher a ngai dawn lova, Pathian thu leh Branch KTP hmalakna mai bakah Bial KTP thurel bawhzui ngaite chu Member tinte hnenah a thawnchhuak thin dawn a ni. Tunah hian Group hruaituten Member-te Mobile phone number an la khawm mek a, May thla tir lam hian hman tan tum a ni.

Commiitee Minute Soft Copy siam a ni dawn

Chanmari Branch Kristian Thalai Pawl chuan a din tirh atanga Committee Minute zawng zawngte mumal zawka enkawl a nih theih nan leh vawn that a nih theih nan Soft copy a siam dawn. Hemi atan hian hma lak mek a ni. Committee Minute zawng zawngte chhut luhna tur Software hi phai lamah siamtir mek a ni a, hun reiloteah peih fel a nih a beisei awm. Chanmari Branch KTP a din tirh atanga Minute Bu-te hi kum 1960 - 1970 inkara mi hmuh zawh tawh loh bak chu la vawn that vek a ni a, hengte hi Software-ah dah luh a ni ang. Tunah hian a chhu lut tu tur te pawh ruat fel tawh an ni a, Software peih a nih veleh hna tan nghal mai theih a ni ang.

Branch KTP chuan nakin hun thlirin Branch KTP sulhnu vawn that a, mamawh hun a awlsam zawk a chhui kir a nih theih nan he ruahmanna hi a siam a ni.

EASTER SUNRISE SERVICE HMAN A NI

Chanmari Branch Kristian Thalai Pawl buatsaihin ni 4 April, 2010 (Sun.) zing dar 5:00 ah "Easter Sunrise Service" hun hman a ni. Hetiang ang hun hi Chanmari Branch KTP a din tirh atangin kumtin hman thin a ni a, tun tumah hian Rev. Dr. R.Lalbiakmawia, Bialtu Pastor-in Pathian thuchah sawiin Branch Committee 'Female Voice' te an zai. Inkhawm banah thlalak hona leh thingpui in hona neih a ni a, he hunah hian mi 118 an tel a ni.

TV. LALRUATSANGA TLABUNG HOSPITAL ATANGIN A CHHUAK LEH TA

Chanmari Branch KTP-a Committee Member a nih laia Missionary-a chhuak, tuna Tuikawi (Home Mission South) a thawk mek Tv. Lalruatsanga chu Malaria avanga Tlabung Hospital-a a awm hnuin ni April ni 6, 2010 (Tue.) ah damdawiin atangin a chhuak leh ta. Tv. Lalruatsanga hi rawngbawlna kawnga inpe leh taima tak a ni a, hun engmemaw chen phai lamah Cricket Coach zira a thang bo hnuah hlawhtling takin a zir zo a, hemi hnu hian Chanmari Branch KTP-ah Committee Member niin, Group Secretary leh Evangelism Sub-Committee ah Secretary a ni tawh bawk. Member-ten tawngtaina ah i dil sak zui zel ang u.