Kumthar kan lo chuang kai leh ta reng mai. Tun kum atang chuan mumal zawk leh changtlung zawkin he Blog hi siam tum a ni a. Tin, he blog rawn visit tu te chu Administrator ah add an ni ang a, engpawh leng tur ah ngai i la. He Blog hmasawn na tur a thawh tur nei chuan Cbox ah emaw Comments ah thu theh luh theih reng a ni e.

KUM 2009 OFFICE BEARERS THLAN A NI

Dt. 15th December '08 (Mon) zan khan nakum 2009 a kan Brnach Office Bearers tur thlanna neih a ni in Nomination atangin mi paruk thlan chhuah an ni a, chung mi paruk thlan chhuahte chuan an Post(Nihna) hi insiam rem in heng mi te hi nakum a kan hruaitu thar tur te chu an ni.

Leader: Pu Zionparlawma
Asst. Leader: Tv. Zoramthara
Secretary: Tv. Vanlalpeka
Asst. Secretary: Pu Zosangliana
Treasurer: Pu Lalsawmkim
Fin. Secretary: Pu Vanlalhruaia Sailo

Synod Inkhawmpui

Mizoram Presbyterian Church Synod Inkhawmpui vawi 85-na chu 10th December, 2008 atang khan Ramhlun North Kohhran Biakin ah tan a ni a. 14th December, 2008 zan hian he inkhawmpui hi a tiak ang. Synod-ah hian Rorel palai 1701 zet an kal.
He Synod-ah hian puipate chu -
Moderator- Rev. H. Lalchhanhima
Secretaries- Upa C. Lalmuankima (Sr.); Rev. C. Laltanliana (Jr.) (Chanmari Pastor)
Finance Officers - Rev. Dr. R. Lalbiakmawia, Rev. C. Rosiama
Statistician - Upa Dr. L.N. Tluanga
Executive Secretaries - Rev. Dr. Lalhmangaiha, Rev. Zosangliana Colney te an ni.
14th December chawmhma inkhawmah khan Pro Pastor thar tur dahnghehna leh Pro Pastor tanglai engemaw zat nemngheh an ni . Pro Pastor nemngheh tur zingah hian Chanmari Branch KTP Member - Tv Zoramsanga s/o Lalkhumtira, Daniela Group (Tuna Hliappui Pro-Pastor ni mek) chu a tel ve. Nemngheh a nih hnu hian Dokamukam, Karbi Anglong Pastor Bial a vawng ang.

Drummer tha tak kan lo nei reng a lawm le

JUBILEE CONCERT

Jubilee denchhena 'A Winter Night Unplugged' chu nuam tak leh pui tak a hmang in nizan 4th December 2008 khan neih a ni ta. Zofaten Concert na a an la tih ngai loh ang in Projector chu announcer(host) atan hman a ni a. Vanapa Hall inchung (chhungah) ah Sponsor tu te leh Lyrics projector hmang tho a tih lan a ni bawk. Tin, sawi tawh ang khan he Concert-ah hian Hollow Guitar, Drums, Bass Guitar leh Keyboards (a chang chang in) hmana a zai hi rem a ni a, tunlai zaithiam kan Gospel Artists neih te chu an tel kim vek tih theih tur a ni.

MLA Election Branch KTP-in buaipui

Vawiin, 2nd December, 2008 hian MLA Election chu neih a ni a, Kan veng chhungah pawh boruak a tha hle a, Govt HSS-ah Polling booth awmin veng mipuiten kan bialtu MLA tur kan thlang.
He inthlanah hian MPF chuan inthlan boruak tha neih a nih theihna turin theihtawpin tan a la a. Vawiina voter te lo tanpui turin Branch KTP chu MPF chuan a beisei a. A beisei angin Branch hruaitu leh Group hruaitute chuan Polling Duty hi an buaipui a ni.

Thlalak en duh tan a link click mai tur - Inthlan Thlalak Album

GOLDEN JUBILEE CONCERT

December 4th a neih tur Golden Jubilee Concert chu chak tak a hma lak mek zel a ni a. Hla pawh ngawrh tak in Artiste leh Musician ten an zir thin a, he Concert hi a hmingah Winter Unplugged tih a ni dawn a, unplugged a hla zawng zawng hi remin Praise and Worship service ang a hman tum a ni a, Session hnih a then a ni anga, 1st session-ah artiste ten an mahni hla sa in 2nd session erawh chu christmas lengkhawm ang a hman tur a buatsaih tum a ni. He concert hi Gan-Sabra (HIV +ve naupang) pual a siam a ni a, a hlawk na zawng zawng pawh he Home hian chang vek tur a ruahhman a ni.

Fanu nei thar

Pu C.Lalthanmawia (Mawitea), Asst.Leader, CBKTP chuan 17th Nov, 2008 chhun dar 11:30 velah khan fanu thar duhawm tak, 3.3 Kgs chu Presbyterian Hospital, Durtlang-ah an nei. Heti hian Pu Mawitea hian fanu 5 a nei ta. Kan lawmpui em em e.

Mizoram Inthlanpui chu kan hma lawk 2nd December hian kan lo thleng dawn ta reng mai. Hemi ah hian kan veng chhung a mi mihlun tak pahnih KTP a kan Branch Leader lo ni tawh ve ve, Pu Rosiamngheta(1998-1999) leh Pu Chawngroliana (2000-2001)te chuan he Inthlanah hian an ding ve dawn a ni.

Pu Rosiamngheta (Siata) hi Aizawl North III (i.e Chanmari, Chanmari West, Electric, Zarkawt, Hunthar & Edenthar) ah United Democratic Alliance ,UDA(MPC) Ticket hming in a ding dawn a.




Pu Chawngroliana (Patea) North-I (Durtlang, Selesih, Bawngkawn, Chaltlang, etc)-ah National Congress Party (NCP) ticket-in a ding dawn bawk.

Thalai te leh veng chhung a mi ten tling ngei se kan duhsak in tawngtaina ah pawh theihnghilhlo i la, he inthlan lo awm turah hian kan ram hruaitu tur midik leh rinawm, Pathian tih mi kan thlan ngei theihnan Pathian hnenah kan dil in inthlan hun chhung a boruak muanawm tak kan neih theih nan i tawngtai ang u.

Mobile Handset

Ka handset (Samsung zawk hi) hi ka hman tirh kha chuan a configuration hi a ho ka ti angreng viau a, a chhan chu - Mp3 players a awm lova, camera (VGA/Mp4 tec) a nei lova, application a dah belh theih loh va, external memory card a nei lova, Bluetooth te chu sawi loh law law chi. SMS a thawn ve theih a, phonebook (500 entries) a nei ve a, chu zawng chu a ni mai.

Mahse ka hman tak tak hnu chuan handset changkang ve deuh hlek ka hman lai ai khan hunawl ka ngah phah ta daih mai tih ka hre chhuak a. A chhan chu Mobile handset hi tunlai hian a tua pawh mai hian kan lo khal nasa hle a, Games, SMS, Music player, Camera, Picture viewing, etc etc atan hian kan hun kan lo seng nasa hle mai. Tunlai changkannain a hrin chhuah ni bawk mahse, kan time table tidang dawrh khawpa hmasawnna kan dawn a nih avang hian hetiang hman chungchangah ngaihtuahna kan sen thiam a pawimawh hle.