GOLDEN JUBILEE CONCERT

December 4th a neih tur Golden Jubilee Concert chu chak tak a hma lak mek zel a ni a. Hla pawh ngawrh tak in Artiste leh Musician ten an zir thin a, he Concert hi a hmingah Winter Unplugged tih a ni dawn a, unplugged a hla zawng zawng hi remin Praise and Worship service ang a hman tum a ni a, Session hnih a then a ni anga, 1st session-ah artiste ten an mahni hla sa in 2nd session erawh chu christmas lengkhawm ang a hman tur a buatsaih tum a ni. He concert hi Gan-Sabra (HIV +ve naupang) pual a siam a ni a, a hlawk na zawng zawng pawh he Home hian chang vek tur a ruahhman a ni.

Fanu nei thar

Pu C.Lalthanmawia (Mawitea), Asst.Leader, CBKTP chuan 17th Nov, 2008 chhun dar 11:30 velah khan fanu thar duhawm tak, 3.3 Kgs chu Presbyterian Hospital, Durtlang-ah an nei. Heti hian Pu Mawitea hian fanu 5 a nei ta. Kan lawmpui em em e.

Mizoram Inthlanpui chu kan hma lawk 2nd December hian kan lo thleng dawn ta reng mai. Hemi ah hian kan veng chhung a mi mihlun tak pahnih KTP a kan Branch Leader lo ni tawh ve ve, Pu Rosiamngheta(1998-1999) leh Pu Chawngroliana (2000-2001)te chuan he Inthlanah hian an ding ve dawn a ni.

Pu Rosiamngheta (Siata) hi Aizawl North III (i.e Chanmari, Chanmari West, Electric, Zarkawt, Hunthar & Edenthar) ah United Democratic Alliance ,UDA(MPC) Ticket hming in a ding dawn a.




Pu Chawngroliana (Patea) North-I (Durtlang, Selesih, Bawngkawn, Chaltlang, etc)-ah National Congress Party (NCP) ticket-in a ding dawn bawk.

Thalai te leh veng chhung a mi ten tling ngei se kan duhsak in tawngtaina ah pawh theihnghilhlo i la, he inthlan lo awm turah hian kan ram hruaitu tur midik leh rinawm, Pathian tih mi kan thlan ngei theihnan Pathian hnenah kan dil in inthlan hun chhung a boruak muanawm tak kan neih theih nan i tawngtai ang u.

Mobile Handset

Ka handset (Samsung zawk hi) hi ka hman tirh kha chuan a configuration hi a ho ka ti angreng viau a, a chhan chu - Mp3 players a awm lova, camera (VGA/Mp4 tec) a nei lova, application a dah belh theih loh va, external memory card a nei lova, Bluetooth te chu sawi loh law law chi. SMS a thawn ve theih a, phonebook (500 entries) a nei ve a, chu zawng chu a ni mai.

Mahse ka hman tak tak hnu chuan handset changkang ve deuh hlek ka hman lai ai khan hunawl ka ngah phah ta daih mai tih ka hre chhuak a. A chhan chu Mobile handset hi tunlai hian a tua pawh mai hian kan lo khal nasa hle a, Games, SMS, Music player, Camera, Picture viewing, etc etc atan hian kan hun kan lo seng nasa hle mai. Tunlai changkannain a hrin chhuah ni bawk mahse, kan time table tidang dawrh khawpa hmasawnna kan dawn a nih avang hian hetiang hman chungchangah ngaihtuahna kan sen thiam a pawimawh hle.

GOLDEN JUBILEE SPORTS Contd.

Golden Jubilee Sports neih mek chu tluang taka chhunzawm zel a la ni a, tunkar 13th leh 15th Nov. 08 ah Basket Ball, Volley ball, Kawikah, Football Final, Throwing events(shot put, discuss & Javelin) te leh Inhruipawh te a group hrang hrang in el na neih a ni in hun hlim awm tak, tang tak leh nuam tak mahse thianghlim taka hman a ni. Tin, ni 18th Nov.08 zanah Computer Games leh Debate hmanga intihsiakna neih leh tur a ni a, Computer Games ah hian mipa in Fifa 2008 an khel anga hmeichhia in Tumble Bugs an khel bawk ang. (Medal lak zat te hi Logos lamah rawn tarlan a nih ang in lo chhiar mai tur in kan in hriattir a ni e)

GOLDEN JUBILEE SPORT

Golden Jubilee denchhen a Golden Jubilee Sport chu dt. 8th Nov. 2008 khan tan a ni ta a, Sports item hrang hrang bakah Games chi hrang hrang te a Group intihsiak ni pah fawmin intihhlimna neih tur a ruahmanna lo awm tawh chu tan a lo ni ta. He Golden Jubilee Sport hian tun thla chhung awh tur a ruahmanna siam a ni. Tuna Group tin ten medal an dawn zat chu:
Daniela Group - 3 Gold
Ezekiela - 4 Gold
Jeremia - 7 Gold
Isaia - NIL
(Nakinah chanchin kimchang leh chiang zawk a rawn tarlan a ni ang)